Knowledge, not a job guarantee. A working professional’s honest review.

PratigyaToh aap kab se padh rahe ho Unisoft mein?

Dipti3 mahine se.

Pratigya3 mahine se. And you are studying Data Analytics?

DiptiYeah.

PratigyaAur aap Unisoft kaise pahunche?

DiptiWaise toh maine online yeh dekha tha. Social media bhi bol sakte hain.

PratigyaAchha, social media par aap gaye the? Instagram par ya Facebook par?

DiptiMaine dekha tha, Facebook par bhi dekha tha. Aur uske alawa maine khud bhi search kiya tha. Main kaafi dinon se search kar rahi thi. Kareeban 3-4 mahine se mera sochna chal raha tha.

PratigyaUnisoft nahi, mera yeh jaanna hai zaroori ki pehle aapke dimaag mein aaya kaise ki aapko, matlab, kuch padhna chahiye, technically, IT mein?

DiptiYeh mujhe kareeban 7-8 mahine se lag raha tha.

PratigyaAchha, 7-8 mahine se lag raha tha? Kyun lag raha tha?

DiptiMujhe finance ka jo yeh tha, mera jo field tha, woh thoda down ho gaya tha. Isse mujhe kuch naya karna tha.

PratigyaAchha, okay.

DiptiMujhe jaana tha ki main usmein aage jaake kuch kar sakun. Aur mujhe waise bhi computer ka, ismein mujhe interest pehle se hi hai.

PratigyaOkay, okay.

DiptiMaine already pehle Java kiya tha. Tab se meri ichchha thi ki main karun, lekin kuch family issues the mere, toh main continue nahi kar paayi.

PratigyaToh aapne research ki ki kuch padhna chahiye IT mein, ya aapko specifically pata tha ki mujhe Data Analytics hi padhna chahiye?

DiptiNahi, mujhe Data Analytics hi karna tha.

PratigyaAur jab aapne search kiya toh kaise search karna shuru kiya? Pehle?

DiptiMaine Facebook mein dekha, Instagram pe dekha, Google pe bhi maine dekha. Ismein ChatGPT wagairah mein bhi maine search kiya, jaise aajkal chalta hai.

PratigyaHaan, haan. ChatGPT pe toh sabhi questions karte hain.

DiptiToh us par bhi maine dekha. Toh mujhe advice di gayi ki yeh sabse achha hai, yahan par bahut achhe se bataate hain. Aur knowledge apna achha hona chahiye.

PratigyaHaan. Toh jab aapne ChatGPT par search kiya tha, toh aapne kya sawaal poocha tha?

DiptiMaine kaunsa course karna chahiye, yeh pehle poocha tha. Maine baad mein yeh poocha tha usmein ki maine kaunse institute se karna chahiye.

PratigyaAchha, yeh bhi aapne sawaal kiya tha.

DiptiToh mujhe [previous institute] ka bataya tha. Doosra yeh bataya tha, Unisoft.

PratigyaAchha, first aapko [previous institute] recommendation aaya tha, and then Unisoft.

DiptiPar [previous institute] ka, main wahan pe gayi thi. Maine unka demo bhi liya tha. Mujhe satisfied nahi laga.

PratigyaAchha. Kya unsatisfaction tha unka?

DiptiJis tarah se woh bata rahe the, aap mujhe jaise bata rahe hain, aap sirf speech de rahe hain. Mera kuch doubt rahenga toh main kaise baat karungi aapse? Uske liye mujhe additional mein jaana padenga, unse personal jaake baat karni padengi.

PratigyaToh aapne call kiya toh unhone sirf bataana shuru kar diya?

DiptiNahi, call kiya nahi. Maine demo attend kiya.

PratigyaAchha, lecture attend kiya. Okay, great. Wahan tak aap pahunch gaye the, demo attend tak. Toh aapko aise nahi laga ki 40-50 bachche join kiye hain toh apne ko bhi karna chahiye?

DiptiUnhone kiya tha sirf job guarantee ke liye. Mujhe job guarantee nahi chahiye thi, mujhe knowledge bhi chahiye tha. Job guarantee lekar kya karun main? Main toh already job kar rahi hoon. Main agar karun toh mujhe usse achha mil sakta hai. Par knowledge hi nahi mera strong toh main kya karun? Woh sirf bata de rahe hain, mujhe samajh mein hi nahi.

PratigyaToh matlab aapka yeh kehna hai ki woh sirf padha rahe the class mein aur samjha ke nahi le rahe the. Woh sirf topic cover kar rahe the. Aapke kehne ka yeh matlab hai. Phir aap Unisoft aaye uske baad?

DiptiNahi, [previous institute] se pehle mujhe Unisoft ka kaafi mahine se pata tha.

PratigyaAchha, yeh bhi tha ki aapko kaafi

DiptiMaine yahan par, mere khayal se, 3 baar enquiry ki thi.

PratigyaOh my God!

DiptiPar mera problem kya tha ki mujhe bahut door padta tha. Isliye mera sochna tha ki karun, nahi karun, karun, nahi karun. Kar lena chahiye. Abhi jaise bhi honga, dekha jaayenga. Manage karna padenga.

PratigyaMatlab aapke kehne ka matlab, jaise bhi hoga, matlab mereko jitni bhi travel distance wagairah rahega, lekin mereko karna Unisoft se hi hai. Toh jab aap Unisoft mein Data Analytics ke liye poochne aaye, toh aapne bhi demo liya yahan?

DiptiYahan demo nahi liya.

PratigyaDemo nahi liya aapne?

DiptiNahi. Maine waise hi, matlab mere mann mein tha, pata nahi, mujhe demo ki zaroorat nahi lagi.

PratigyaAap kis se mile yahan par?

DiptiYahan par Satish sir the. Nahi, usse pehle Akshay sir ne mujhe kaafi achhe se samjhaya.

PratigyaWah, good.

DiptiUnka jo bataana tha, mujhe jo unhone manually thoda bahut jo bataya tha, woh mujhe kaafi impressive laga ki mujhe turant samajh gaya ki, mujhe aisa laga ki nahi, maine karna chahiye. Because jo woh samjha rahe the, woh step-wise poora samjhaya tha.

PratigyaToh aapne abhi class kiya, toh aap kisi ko Unisoft recommend karoge?

DiptiKarungi. 100% karungi.

PratigyaKyun? Matlab koi bolega, main Unisoft kyun jaun? Aur bhi toh institutes hain.

DiptiNahi. Yahan par har student ko personally lekar, achhe se attention deke bataya jaata hai. Aisa nahi ki class chal rahi hai, unko doubt hai, tum baad mein poocho. Aisa kuch bhi nahi hota hai. Yahan par pehle unke doubts clear kiye jaate hain. Har ek student ko samajh raha hai ki nahi, yeh dekha jaata hai.

PratigyaJaise koi bolta hai na, main IIT ka online course kar raha hoon. Uske comparison mein aap bolenge, tumne woh kyun nahi kiya? Unisoft se kyun kar rahe ho? Toh aap usko kaise compare karoge?

DiptiAchha. Jaise apan topic lete hain, koi ek subject, ismein apne ko poora aana chahiye. Aisa nahi ki upar-upar se apne ko yeh ismein hai, toh aage chaliye. Aisa nahi. Apne ko deep knowledge jo mil raha hai, usko zyada pehle cover karein.

PratigyaToh ma'am, deep knowledge cover karne ka time aajkal bachche sochte nahi hain.

DiptiAise sochte nahi hain, maanti hoon. Lekin aage jaakar woh future mein kahin interview mein jaayenge, kahin jaayenge, unko future mein problem create honge toh aayenga na? Phir woh senior se unko phir bolte hain ki arre, tumne kya kiya? Tum itna bada course karke aaye ho, yeh kya padha tumne? Kuch nahi kiya.

PratigyaTheek hai. Aap kya kehna chahte the, Saurabh sir?

SaurabhMaine dekhe hain aise logon ko. Yeh bolte hain ki, yeh padhke aate hain bahar se log, bolte hain humne toh yeh course kiya hai, yeh course kiya hai. Mere neeche hi kaam karte hain log, mere junior.

PratigyaActually, aapko aisa nahi lagta ki baaki institutes, kyunki bachche aise hain, ya phir log aise jaake poochte hain ki humko course padhna hai, humko course mein jo padhaya ja raha hai woh aana chahiye, aisa kisi ka concentration nahi rehta. Ya koi jaata hai toh woh 100% baatein aisi lubhaane wali karte hain ki hum job denge, yeh course kar lo. Matlab is wajah se log zyadatar course join karte hain?

Dipti100% job guarantee ke liye log zyada karke aate hain. Yahi hai, ki nahi, is institute mein 100% job guarantee de rahe hain. Bhale apne ko aaye na aaye, Aapko waise ek baar enquiry karenge toh itne calls aate hain poochne ke liye. Fees bhi woh log kam karke dene ke liye taiyaar rehte hain. 100% job denge, sab denge, aap hamare paas course karo.

DiptiYahan se mujhe aise koi call nahi hai.

PratigyaHum nahi karte hain. Kyunki mujhe ek baat ka logic clear kariye. Job institute deta hai ki company deti hai?

DiptiCompany deti hai.

PratigyaToh salary kaun dene wala hai? Institute dene wala hai ki company dene wali hai? Toh kaam aapko institute ke star pe karna padega ki company ke star pe karna padega? Yeh logic hi nahi ki main aapko course isliye bechun ki main aapko yeh bolun ki 100% job guarantee. Logic toh yahi hai na ki aap kuch seekhne aaoge hamare paas, aap seekhkar jaoge, aur uske basis par aapko kaam milega aur aap kaam kar paoge. Main jab call leti hoon enquiry ka, ya koi pehla message bhi aayega, jaise main aapko dikhaun, WhatsApp pe mere aayega ki I want course details of Data Analytics. Toh unka second sawaal yeh rahega, 100% job guarantee hai kya? Toh mereko lagta hai ki main inko kya jawaab dun? Aap course isliye karna chahte hain kyunki is course ke basis par naukri milne wali hai. Definitely, agar aapke paas us course ka skill set aa jaayega toh aap interview crack kar sakoge. Aur aap interview crack kar sakoge toh aapke haath mein shayad employment letter bhi hoga. Lekin it is not sure na, ki aapne mujhse kuch padha toh aapko naukri milegi. Yeh kaise assurance de sakte hain na hum log? Yeh toh jhooth assurance ho gaya. Kyunki aapne jis course ko samjha hai, humne jo padhaya hai, woh course ko jaise samjha hai, uske upar hamara bahut kuch dependent rahega.

PratigyaYahan par jitne bhi faculty se agar aap unse aapka doubt poochoge padhaate samay, toh phir woh aapke level tak utar ke aapko us level par leke jaayenge. Kyunki pehle humko aapko samajhna zaroori hai ki aap technology kis tareeke se samajh sakte hain. Aur phir hum uske baad samjha sakte hain ki theek hai, isko aise nahi, aise hai. Matlab jo bhi examples hum quote karein, woh examples aise hone chahiye jo aap samajh sakte hain. Isliye jitne bhi faculty se yahan pe miloge, woh pehle samjhenge ki aapko kitna samajh raha hai. Na ki yeh push karenge ki achha, aapko toh samajh mein nahi aayega, chhodo yeh topic.

DiptiYeh kaafi ismein bhi hota hai. Kahin par, tum naye ismein ho, tumhara background iska hai, tumhara commerce ka background hai. Achha, yeh ismein aapko thoda difficult jaayenga, toh tum cover kar lena. Aise bhi bolne wale hain. Achha, tum cover kar lena, tum samajhne ki koshish karo. Aisa bhi karte hain.

PratigyaYeh sentence kaise bol sakte hain ki tum samajh lena? Mera kaam hai tumhe samjhaana. Mera kaam hai, ki main padha rahi hoon toh mera kaam hai ki main aapko samjhaun. Na ki main aapko yeh bolun ki dekho, maine sikha diya hai, tum samajh lena. Yeh kaise bol sakte hain na? Bhai, agar aapko khud hi samajhna hota toh aise toh bahut saare video lectures aur documents hain.

DiptiInstitute ka naam achha hai na, pakka achha hi milenga. Certificate pe toh achha hi ho jaayenga na. Aisa bhi rehta hai.

PratigyaAur yeh do lines mujhe bahut achhi lagi aapki, ki tum samajh lena.

DiptiNahi, hai. Aise maine dekha hai.

PratigyaMain toh samjha dungi, tum samajh lena. Yeh line toh bahut badhke lagi mujhe. Maine aaj tak istemaal nahi ki, ki main samjha rahi, tum samajh lena.

PratigyaDifficulty, ma'am, Data Analytics ho ya technology ho, usmein samajhne mein nahi jaati, agar aap examples ko, ya jo bhi dekhiye. Aap mobile use karte ho. Toh mobile mein aise bahut saare apps hain jo aap use karte ho. Agar aap us app ke baare mein socho ki woh bane kyun hain, kis difficulty se hamare paas aaye hain, aur yeh app ki hamein zaroorat kya padi. Ab jaise, for example, aap Blinkit le lo. Blinkit app ki zaroorat kyun padi? Kyunki kai baar aisa hota hai ki hum bhale mahine ki grocery plan bhi kar lein, lekin koi event aa gaya, koi function aa gaya, koi guest aa gaya, toh hamare paas woh saamaan ki kami reh sakti hai. Ya humne yeh socha nahi hoga ki humko mahine bhar mein noodles banaane hain ghar mein. Toh hum, agar maan lo aaj mujhe banaana pad gaya, koi guest hai, toh maine socha yaar, easy, maine naya seekha noodle banaana. Toh ya main market jaun, noodle laun, ya phir next month ke grocery mein laun. Isliye mujhe zaroorat padi noodle banaane ki, toh maine Blinkit kiya, aur woh ghar aa gaya, aur ab main bana rahi hoon. Ab samjho, this is the necessity. Main market jaun, kisi dukaan tak jaun, woh operation ko, ya woh us process ke difficulties ko samajh ke woh Blinkit banaya gaya. Toh jab aap, agar apne apps jo use kar rahe ho, un saari cheezon ko samajh ke agar aapne banaya, koi operations ko samjha, ya app ko samjha, ya technology ko samjha, toh aapko samajh mein aayega ki iska use kya hai. Maine abhi aapko Blinkit ke level pe ek example diya. Lekin aisi kai cheezein hain. Main kuch bana rahi hoon aur us samay pe mere paas kesar khatam ho jaaye. Maan lo main kheer bana rahi hoon, jo ki banayi nahi maine aaj tak, aur kesar khatam ho jaaye. Ya kesar mere ghar mein kabhi laaya hi nahi gaya. Aur us samay agar mujhe laga ki arre yaar, meri kheer adhoori rahi, toh phir maine agar Blinkit kar diya toh kesar aa jaayega ghar mein. Right? Woh mera effort ki wahan tak jaun, main khareedun, aur phir usko banaun, Ab isi ka ek example aap sochiye ki Blinkit stores aaspaas saare hain, ya ordering stores aaspaas hain. Toh kya hua? Jab inhone app introduce kiya, toh app introduce karne ke baad jab inhone dekha ki hum saare products toh nahi rakh sakte hain, nahi toh mera store kitna bada ho jaayega, aur hamare paas limited space hai. Toh inhone socha ki area mein sabse zyada product kitne baje order ho raha hai. For example, agar aap Blinkit kar rahe ho ya Zepto kar rahe ho, dekhoge toh subah sabse zyada order hoga doodh. Highest level par doodh order hoga. Kyunki log bhool jaate hain packet laana raat ko. Subah order ho raha hai. Doodhwala nahi aaya, toh ab chai toh peeni hai, doodh toh chahiye. Toh unhone Blinkit se mangaana shuru kiya, ya Zepto se. So this is analysis. I launched the product, I launched the aggregator first. Then maine ek record banaya, ek mahine ka record dekha, order record dekha. Aur uske hisaab se area mein, kyunki jahan, ab maan lo, jahan pe Ganesh ji ka time tha, toh sabse zyada woh bik raha tha aapka modak. Toh modak ke ingredients bik rahe the. Aapko bataun, durva tak mil raha tha aapke Blinkit pe. So that was the time, so they kept it. Ek certain time frame mein, aarti ke time pe, aur shaam ki aarti ke time pe Blinkit mein aap dekhoge durva order hoga. Toh yeh data analysis hai. Main usi product ka store apne aap banaun, sabse zyada, us time pe, aur usi samay woh bike. Toh yeh bahut basic logic hai. Agar yeh examples leke aap common man ko bhi samjhaoge toh usko samajh mein aayega ki ab aapko yeh numbers samajhna kitna aasaan ho jaayega. Toh ismein kaunsi kathin baat hai? Ki agar aapne aise examples deke samjhaye.

DiptiBlinkit ka use aapko bhi hai, mereko bhi hai, sabko hai.

PratigyaThere is nothing non-technical about it. IT walon ko pehle background process ko samajhna, common man ko samajhna, common man ki utility ko samajhna, woh zaroori hai. Jaise hum bolte hain, engineers ke liye, usko mechanical product banaane ke liye pehle samajhna zaroori hai ki machine ki takleefein kaunse kaunse level pe hain, aur kaunsa humko nut banaana padega, ya kaunsa humko woh banaana padega, kya kehte hain usko, motors jis pe chalti hain? Bearing. Kaunse size ki bearing se hamari belt smooth hogi, kaunse size ki bearing se hamari smooth nahi hogi, fast kaise hoga, yeh engineer samajhta hai. Ab us engineering ko automate karne ke liye IT, uske calculation ko IT. Toh IT wale kuch nahi hain, calculation, time aur productivity badhaane ke liye hote hain. Ab logon ko samjhaana mushkil hai. Logon ko lagta hai ki samjhaana mushkil hai. Woh bolte hain, nahi nahi, pehle programming seekho. Pehle programming seekho, baad mein cheezon ke upar jao.

PratigyaToh aisa hai. Kuch aur aapko aisa hai jo convey karna chahoge ki logon ne Unisoft kyun join karna chahiye? Ya koi bhi aapke mann mein koi aisi baat ho, ya feedback dena ho ki yeh cheez hum sudhaar sakte hain, ya yeh cheez yahan ki bahut achhi hai. Dono bhi baatein aap keh sakte ho. Sirf achha hi kehne ki zaroorat nahi hai.

DiptiYahan ki jo main concept hai ki hum AC ke liye nahi aaye hain yahan par, ki AC classroom hai. Main concept hai ki humko faculty sahi milna chahiye, taaki main samajh sakun.

PratigyaToh aapki baat sahi hai. Aur koi baat aapko jo kehni ho? Curriculum agar aapne compare kiya ho other institutes se, content wagairah kuch compare kiya ho?

DiptiYahan par content toh zyada hi bataye jaate hain. Woh jo SQL ke bhi points jo bole jaate hain, abhi mera SQL chal raha hai isliye main us par hi zyada bata sakti hoon. Usmein jo bahar ke ismein cutting ho jaati hai, woh yahan par poore points cover ho rahe hain.

PratigyaWoh toh time saving ho gaya na, ma'am, ki utna hi padhao jitni zaroorat hai kaam ke liye?

DiptiNahi, nahi. Aapko pata toh hona chahiye. Aap direct jump kaise karenge aage?

PratigyaNahi, nahi. Woh toh institutes mein aisa hi hota hai ki DML aur DDL statements par class khatam. SELECT padhne ki zaroorat nahi hai. Aapko kyun lagta hai, hum log poora kyun padha rahe hain?

DiptiJo hum log aage ki, future ki sabse zaroorat rahengi, isliye woh poora hi hoga. Jaise jo hum log interview ke liye jaayenge, toh hum log poora pata rehna chahiye.

PratigyaMain ek aur reason dungi ki hum log poora isliye padha rahe hain, kyunki ma'am, foundation strong hona chahiye. Logic, concept baad mein build hota hai. Pehle agar aapko cheez pata hogi toh aap usko logic se jod sakte hain. Nahi toh aap usko logic se nahi jod paoge ki mujhe aage jo optimization, yeh jitna enhancement ho raha hai. Tab tak mera foundation clear nahi hoga. Aur agar kisi product ka, basically SQL poora manual hai. Ek manual kitaab se jab aap padhte ho toh aapko step-wise pata rehna chahiye. Aisa nahi ho sakta ki main chautha screw pehle kholun, pehla screw kholun hi nahi. Toh product nahi chalega. Isliye logic samajhne ke liye SELECT is very necessary. Logic samajhne ke liye uske baad ke jo chapters hain, jab tak aap basic SELECT command nahi loge, aapko UPDATE kaise pata chalega? Aapko CREATE TABLE kaise pata chalega, ki karna kyun hai? Agar mujhe bag dhoondhna hai internet pe, ki kaunse portal pe sasti bag milegi, toh mereko pehle bag ka concept toh pata rehna chahiye. Ki mujhe handbag chahiye, mujhe purse chahiye, mujhe trolley bag chahiye, mujhe kaunsa bag chahiye. Woh toh pata rehna chahiye. Toh isliye basic is necessary. Aap agar koi bhi point skip kar jaate ho toh aap us kadi ko jod hi nahi paoge.

PratigyaAap us kadi ka concept hi nahi jod paoge usmein. Isliye detailed curriculum. Toh abhi mere paas recently ek banda aaya tha. Saturday ko, abhi Saturday ko, last Saturday ko. Bole ki mujhe yeh 11 topics padha do. Selected topics. Main working professional hoon, mere paas time bhi nahi hai. Aur maine bola, sir, matlab main beech se yeh uthaun? Maine kaha, aapko kuch aata hai? Bole, bas yeh nahi aata, yeh nahi aata. Power BI aata hai. Aur woh main topic hai uska, Power BI ka. Yeh kaise ho sakta hai? Toh bole, yeh mere office mein kaam padta hai, aap yahi sikha do. Woh ek topic usne liya, usne 7-8 topics Excel ke bataye, bole yeh padhao. Maine kaha, sir, hum padhayenge poora, aap aapka le lo ismein se concept. Kyunki mujhe base toh build karna padega na samjhaane ka. Main yeh kaise maan lun ki aapko pehle ka aata hai? Bole, mujhe office mein iski zaroorat padti hai toh aap itna hi padhao. Isse pehle ka aur aakhiri ka kuch bhi nahi padhna hai. Maine kaha, sir, hum nahi padha paayenge. Aap doosri jagah chale jaaiye. Hamare yahan se usko doosra call bhi nahi gaya. Woh interaction ke liye bhi taiyaar nahi tha, ki ab faculty se interact karke bataye ki usko kya-kya aata hai. Beech se kaise padhayenge na, ma'am?

DiptiBeech se toh nahi padhayenge. Aise toh kaafi bachche aate honge aapke paas, humko yahi topic karna hai?

PratigyaAate hain na. Hum mana kar dete hain.

PratigyaHum apne faculties ko process se rolled out, aise karke, beech se yahi padha do, 2 ghante ka kaam hai, aisa nahi karte hain. We also see they are putting their best of the effort. Woh theek hai, for everybody it is a job, right? Unke liye bhi yeh job hai, lekin ultimately unko bhi itna motivate aur demotivate karo. Pehle motivate karo, phir unko demotivate karo ki yaar, inko itna hi padhao toh jaane do. Unka bhi toh naam kharaab hota hai. Long term mein institute dhyaan nahi rehta logon ko. Long term mein trainer yaad rehta hai, ki mujhe isne yeh padhaya tha, yeh mere kaam aaya. Aap mujhe bhool jaoge, lekin aap Raina ko nahi bhoologe na? Raina bhi aapke saath lagi hui hai ki aapko yeh cheez aani chahiye. Toh jab aap woh use karoge toh aapko sabse pehle yahi yaad aayega ki Raina ma'am ne mujhe yeh samjhaya tha. Main Raina ma'am ko mili Unisoft mein, yeh secondary ho gaya baad mein. Aaj aapke liye yeh first hai ki haan theek hai, Unisoft mein aap aaye aur aapko padhaya achha gaya. Yeh aap abhi kahenge. Lekin long term mein jab aap job kar rahe hoge aur aapko koi difficulty aayegi technology ki, toh aap mujhe toh nahi message karoge, aap unko message karoge. Toh phir unke liye bhi toh naam important hai na, ki maine jisko padhaya hai woh mereko yaad rakhe, ki haan theek hai, uske kaam aaya. So that is very necessary. Unke liye bhi toh hai, Saurabh sir ke liye. Aaj bhi unke 2012, 2013, 2014 ke padhe hue candidates unko message karte hain ki sir, ab aage kya padhun? Inko bhi same hai. Inke toh kitne students hain jinko inhone single-single bhi padhaya hai. Woh bhi kitne students inke contact mein hain, message karte hi rehte hain, humko yeh difficulty hai, humko woh difficulty hai. Aur phir poochte rehte hain, abhi main is company mein hoon, main aage kya padhun?

PratigyaJo course dhoondh raha hai, unke liye koi line, aisi koi baat aap kehna chahengi ki kyun karna chahiye Unisoft, ya phir pehle kaise research karna chahiye? Koi ek aisa point aapko kuch kehna hai?

DiptiEk toh main yeh kehna chahungi ki ekdum se, jaise apan kahin search karte hain, apan poochte hain ki yeh course karna chahte hain, Nagpur mein kahan se achha rahenga karke. Wahan bhi itni saari list aa jaati hai. 3-4 aise dikha dete hain usmein. Toh apan call karke poochenge, aapke yahan kya-kya padhaate hain? Koi bataate hain, hum log 4 mahine mein yeh kar rahe hain. Koi bol raha hai, 3 mahine mein yeh kar rahe hain. Aise 3-4 institutes mein aap call karke poochenge. Phir fees ka bhi dekhenge aap. Kahin par aisa hota hai ki fees equal rehti hai, sikhaane ka time bhi kam rehta hai. achhi jagah se karo. Toh main bolun, Nagpur mein toh sabse best naam jo aata hai, Unisoft ka hi aata hai. Yeh bhi kabhi kahin par rehta hai ki bahar se dikhaane ka kuch tareeka alag rehta hai, andar kuch alag rehta hai. Yeh bhi rehta hai.

PratigyaAur mujhe achha laga ki aapne research kiya aur apna decision aapne khud liya, research karke. Nahi, woh input bhi achha hai. Kyunki log itna baatcheet nahi karte hain, log itna vocal nahi hote hain, log apne points nahi rakhte hain. Log seekh toh lete hain, phir seekhke introvert rehte hain, toh woh chale jaate hain ki hamein kya matlab, hum kyun inse behas karein? Toh aapke woh do points bahut important hain. Log usi myth mein reh jaayenge na, ki humne toh padha diya, lekin tum non-technical background ke ho toh tum khud hi samajh lena. Yeh saare points bahut important hain. Matlab dono bhi important points lage mujhe.

PratigyaAap certification kariye. Agar aapko experience itne saal ka hai, abhi hum kara denge aapka course, toh uske baad mein global certification. Excel mein toh bhi Excel ka ek certification, aur SQL ka aap exam dijiye. And then you try to search. Because aage chalke aap jaise experience with technology, kyunki FinTech mein toh chahiye hi hain log jinko poora experience bhi ho aur jinko yeh achhe se aata bhi ho. Toh scope toh bada hai, lekin how do you approach bhi ek factor hai. Sirf certificate bhi, yahan se course kar liya, main hoon ya baaki hum hain, Unisoft ya phir baaki institutes ho, isse institute ke certificate ki nahi, product-based certification ki value bahut zyada hai. Toh aap zaroor uski koshish kariye. Main, matlab, lagataar ma'am se feedback aapka lete rahungi. Jis tarah se mujhe lagega ki ab aapko push karna chahiye, matlab abhi time hai, aur 2-3 mahine time hai. Once you finish at a certain level, I will tell you kaunse certification ki taiyaari karo. Agar apne ko push karna hai toh sirf padhne se aur certificate se nahi, apne ko aur bhi cheezein usmein add karni padegi. Aur aapke experience ko hum kaise dikhaate hain, woh bhi matter karta hai. Profile. Thank you.

DiptiAapne itna time diya, uske liye thank you.